Xalqımızdıń_qos_juldızı
orazbay 7-10-2025, 16:39 5 Новости / Yangiliklar / Жаңалықлар
🎭6-oktyabr kúni Berdaq atındaǵı Qaraqalpaq mámleketlik akademiyalıq muzıkalı teatrında kórkem óner hám dóretiwshilikke baǵıshlanǵan saltanatlı keshe bolıp ótti. Bul kún tek ǵana kórkem óner áleminiń jarqın juldızları emes, al pútkil xalqımız ushın este qalarlıq waqıya boldı. Sebebi búgin biz Ózbekstan hám Qaraqalpaqstanģa miyneti sińgen kórkem óner ǵayratkeri, Berdaq atındaǵı mámleketlik sıylıqtıń laureatı, birinshi qaraqalpaq professional xudojnigi, óziniń kórkem ónerge bolǵan pidayılıǵı menen áwladlar ushın ayqın úlgi bolǵan Qıdırbay Saypovtıń 85 jıllıq yubileyi bolıp ótti.Qıdırbay Saypov - birinshi professional qaraqalpaq xudojnigi, Berdaq atındaǵı mámleketlik sıylıqtıń laureatı, óz dóretiwshiligi menen insan qálbin bayıtqan hám mádeniyatımızǵa mıńlaǵan shıǵarmalar arqalı nur taratqan ullı kórkem óner ǵayratkeri. Ol dóretken hár bir súwret, hár bir shıǵarma ózinde xalqımızdıń tariyxın, tábiyatın hám ruwxıy dúnyasın sáwlelendiredi. Búgingi keshe bizge onıń ómiri hám dóretiwshiliginiń qansheli bay hám tereń ekenin jáne bir márte esletti.
Sonıń menen birge, Qıdırbay Saypovtıń ómirlik joldası, Qaraqalpaqstan Respublikası xalıq artisti Záwre Saypovanıń 80 jıllıq yubileyide belgilendi. Záwre Saypova saxnadaǵı dóretiwshiligi menen kóplegen áwladlardı ilhamlandırǵan, mádeniyatımızdı jáne de bayıtqan kórkem óner sheberlerimizden biri. Ol saxnadaǵı hár bir shıǵıwında tamashagóy qálbine jıllılıq baǵıshlap, kórkem ónerdiń haqıyqıy mánisin sezdirgen aktrisalardıń biri.
Yubiley baǵdarlamasına teatr direktorı P.Mamutov, ustaz aktyorlar hám aktrisalar, sonday-aq, Qıdırbay Saypov hám Záwre Saypovanıń jaqınları da mirát etildi. Olar saxnada shıǵıp sóylep, kórkem óner ǵayratkerlerin qutlıqladı, olardıń miyneti hám pidayılıǵın joqarı bahaladı. Bul qutlıqlawlar keshege tamashagóylerdiń kewlinde jıllı estelikler qaldırdı.
Yubiley keshesi júdá bay hám qızıqlı bolıp ótti. Saxnadaǵı shıǵıwlar, janlı muzıkalı dòretpeler, fotokórgizbeler hám film kórinisleri miymanlarda ózgeshe sezim qaldırdı. Hár bir detal kórkem óner hám dóretiwshilikke bolǵan húrmetti jáne de kúsheytti. Tamashagóyler kewlinde jıllılıq hám ilham oyatqan bul keshe, tek ǵana jeke jetiskenliklerdi tán alıw emes, al Qaraqalpaq mádeniyatınıń baylıǵın, kórkem ónerdiń insan ómirindegi ornın jáne bir márte kórsetti.
Qıdırbay Saypov hám Záwre Saypovanıń dóretiwshiligi - bul áwladtan-áwladqa jetetuǵın úlken miyras bolıp esaplanadı. Olardıń miyneti, sheberligi hám pidayılıǵı xalqımızdıń mádeniy turmısın bayıtıp, kórkem ónerdi jáne de qádirlewge iytermeleydi. Búgingi keshe sonı kórsetedi kórkem óner hám dóretiwshilik hesh qashan waqıt penen sheklenbeydi, ol insan qálbin toltırıp, ruwxıy baylıq jaratadı hám jámiyetti birlestiredi.
Usı tárizde, yubiley keshesi tek ǵana kórkem óner sheberleriniń jeke jetiskenliklerin qádirlew emes, al pútkil xalqımızdı kórkem ónerge bolǵan muhabbat penen birlestiretuǵın áhmiyetli waqıya sıpatında tariyxta óz izin qaldıradı. Qıdırbay Saypov hám Záwre Saypovanıń xızmetleri, pidayılıǵı hám dóretiwshilik miyrası máńgi qádirlenedi hám olar haqqındaǵı eske túsiriwler áwladtan-áwladqa jetip baradı.
✅Teatrdıń málimleme xızmeti.
Похожие новости
Gulsara Jumaniyazovanıń yubiley keshesi
23.05.25
Новости / Yangiliklar / Жаңалықлар
100_MÁWSIM ASHLÍWÍ
03.09.25
Новости / Yangiliklar / Жаңалықлар
PREMYERA Qanlı toy
05.09.25
Новости / Yangiliklar / Жаңалықлар
Mamutov Paraxat Allambergen ulı teatr direktorı
2024- jıl noyabr ayınan baslap Berdaq atındaǵı Qaraqalpaq mámleketlik akademiyalıq muzıkalı teatrı
14.12.24
Teatr direktorlari / Директоры театра / Teatr direktorları
Gulsara Jumaniyazovanıń dóretiwshilik koncerti
17.06.25
Новости / Yangiliklar / Жаңалықлар
