Шынықулова Светлана Усеновна

Қарақалпақстанға хызмет көрсеткен артист 

Шынықулова Светлана Усеновна

 1965-жылы 17-февральда Нөкис қаласында дүньяға келди.

Сахнада атқарған еӊ дәслепки қосығы «Анажан» атлы қосығын  5-классында атқарып шыққан. Оныӊ көркем өнерге болған қызығыўшылығы қосықшы боламан деген арзыў нийетлери Жапақ Шамуратов атындағы көркем өнер училищесине алып келеди. Бул жердеги устазы Өзбекстан ҳәм Қарақалпақсан халық артисти Базарбай Надировтан қосық айтыў сырларын үйренди. 

1984-жылы Бердақ атындағы Қарақалпақ мәмлекетлик академиялық музыкалы театрына жумысқа киреди. Сол жылы Дағыстан Республикасыныӊ Мақаш қаласында ҳәм Қазақстан Республикасында, Өзбекстан Республикасы Ташкент қаласында ҳәм Хорезм ўәләятында өткерилген мәденият күнлерине қатнасқан.

 Ол актёр сыпатында дәслепки роли Мольердиӊ «Гүӊелек қыз ҳәм тәўип» спектаклинде Люсинда образы қазақ драматурглери Қ.Байсейтов ҳәм Қ.Шаӊқытбаевлардыӊ «Ұш бойдақ» спектаклинде Айсулыў, Т.Сейтжановтыӊ «Мени судлаӊлар» спектаклинде Сәўле, С.Хожаниязовтыӊ «Сүймегенге сүйкенбе» спектаклинде Ажар, Н.Дәўқараевтыӊ «Алпамыс» спектаклинде Гүлпаршынныӊ жеӊгеси образларын атқарып шыққан. 

Хор жәмәәтинде солистка болып қосық айтқан. Мысалы: Қ.Заретдиновтыӊ «Арал муӊы», Қарқалпақ халық қосығы «Налыш», З.Лепесовтыӊ «Мен бар жерде», «Кеўил толғанысы» ҳәм басқада қосықларды атқарып шыққан. Республикалық масштабта өткерилген Ғәрезсизлик ҳәм Наўрыз байрамларында қосықлар атқарып шыққан. 

Ол өмирлик жолдасы актёр Жаӊабай Өтепбергенов пенен биргеликте еки қыз ҳәм бир улды өсирип камалга келтирген. 

2000-жылы оған Қарақалпақстан Республикасына хызмет көрсеткен артист атағы берилди.