МАТЖОНОВ Байрам (1940-2020)

МАТЖОНОВ Байрам (1940.29.4, Қўнғирот) — қорақалпоқ хонандаси (лирик баритон) ва реж. Қорақалпоғистон (1974), Бошқирдистон (1978), Ўзбекистон (1982) халқ артисти. Тошкент театр ва рассомлик санъати ин-тини тугатган (1963). 

Қорақалпоқ давлат филармониясида яккахон хонанда (1963—66), Қорақалпоқ теле-студиясида реж. (1966 й.дан), бош реж. (1967—69), Қорақалпоқ давлат филармонияси (1971-77 ва 1981 й.дан), Қорақалпоқ ёш томошабинлар театри директори (1978—80). Ёқимли, кенг диапазонли, лирик овоз соҳиби. 

Ижро услуби юксак маданияти, ўзига хос миллийлиги, ижросидаги фалсафий мазмуни, маҳорат кучи б-н ажралиб туради. Репертуаридан қорақалпоқ мусиқали драма («Ойгул ва Обод», О. Ҳалимов; «Ғариб Ошиқ», А. Бегимов, Т. Олланазаров, О. Ҳалимов ва б.) ва опера («Ажиниёз», Н. Мухаммаддинов) лардан ариялар, миллий композиторлар асарлари («Гўдак ҳақида баллада», «Менинг йигитлик пайтим, сенинг қиз пайтинг», «Ёшлик ҳақида баллада», «Бўлмас», Н. Мухаммаддинов; «Улкамга келинг», «Юлдузлар», X. Турдиқулов; «Мен деҳқон фарзандиман», Н. Мусаев ва б.) ўрин олган. Ҳамза номидаги Узбекистон Давлат мукофоти лауреати (1974, 1988).